Прежде даже сподоблюся (аще сподобленъ буду недостойный) въ будущемъ вѣцѣ видѣти Христа Господа, Царя Небеснаго, и о зрѣніи Пресвятаго Лица Его веселитися: се, въ нынѣшнемъ вѣцѣ сподобльшися видѣти Пресвѣтлое Лице Христа Господня, Помазанника Божія, Царя земнаго, Христіанскаго, Православнаго Монарха, Ваше Царское Пресвѣтлое Величество, радости исполняюся! Исполняюся радости по подобію сыновъ Сіонихъ, о нихже Давидъ: сынове Сіони возрадуются о Царѣ своемъ (Псал. 149, 2). Во правду сей Богоспасаемый Царствующій градъ Сіономъ вторымъ нарещи прислушаетъ, егда Благодать Божія отъ Ветхозаконнаго пренесшися Сіона, возсія на немъ Христіанскимъ Православіемъ: и здѣ-то сынове Сіони, Христіано-Россійскія чада радуются о Царѣ своемъ. Радуются: ибо лице Царево есть радостотворно, якоже и лице Ангела, радость приносящее. Не всуе мудрая Ѳекоитяныня въ Божественномъ Писаніи иногда Царя своего Давида нарече Ангеломъ: якоже Ангелъ Божій, тако Господинъ мой Царь, послушая благихъ, лукавыхъ же небрегій; сего ради Господь Богъ твой да будетъ съ тобою. И паки: Господинъ мой Царь мудръ, благъ, якоже мудрость Ангела Божія, разумѣя все, еже на земли (2 Цар. 14, 17. 20). Дважды Ангеломъ Царя нарече Ѳекоитяныня, ово за мудрость, ово за благость. Мудрость убо Царева управляетъ Царство, благость же утверждаетъ Престолъ Царскій: обоихъ же ради тѣхъ винъ, сынове Сіони возрадуются о Царѣ своемъ, аки о Ангелѣ Божіемъ. Еще же и того ради о Царѣ радоватися прислушаетъ, яко лице и санъ Царя Христіанскаго на земли есть живый образъ и подобіе Христа Царя, живущаго на Небеси. Якоже бо человѣкъ душею своею есть образъ Божій и подобіе: сице Христосъ Господень, Помазанникъ Божій, саномъ Своимь Царскимъ есть образь и подобіе Христа Господа. Христосъ Господь на Небеси, въ Церкви Торжествующей, есть первенствуяй: Христосъ Господень на земли, Благодатію и Милостію Христа Небеснаго, въ Церкви Воюющей первоводствуяй. Той горѣ соплетаетъ Вѣнцы: сей долу умножаетъ подвиги, Вѣнцовъ достойные. Той побѣдившихъ Вѣнчаваетъ, сей къ побѣдѣ добрыхъ воиновъ устрояетъ. Той готуетъ вѣчная воздаянія: сей отважныхъ рицеровъ поощряетъ къ храброму боренію, да не вотще текутъ, ни туне вѣчная воздаянія пріимутъ. Той положилъ душу Свою за Церковь Свою, юже стяжа честною Си Кровію: не щадитъ и сей души Своей за Его Христову святую Церковь, за цѣлость Отечества Христіанскаго полагаетъ душу Свою, несучи Свое здоровье, ставячи Свои перси противъ непріятелей, и подъимаючи вси военніи въ полцѣхъ не въ часы труды. О таковомъ Царѣ Сынове Сіона мысленнаго, Христіанскаго, како не имутъ радоватися? Кто бо, узрѣвъ Христа Господа своего, на небеси суща, не возрадуется, развѣ не истинный рабъ Его? Кто, узрѣвъ и Христа Господня на земли, не исполнится радости, развѣ не истинный работникъ Его?

А якоже санъ Царя Христіанскаго на земли есть образъ и подобіе Христа, Царя Небеснаго: сице и маестатъ [статус, слава власти, Царский Престол] Христа Господня имать таинственнѣ нѣкое подобіе къ маестату Христа Господа. Онаго маестатъ на Небеси почиваетъ, и носится на четырехъ животныхъ, въ нихже лице орлее, лице человѣчье, лице львово, лице тельчее: Христа Господня маестатъ на земли имать, по подобію оныхъ горнихъ лицъ, своя носители, на нихже почиваетъ.

Благородніи Князи и Боляре, то аки лице орловъ высокопарныхъ, высокородныхъ, иже честь и славу Царя своего вышши себе возносятъ, зная и исповѣдуя того быти надъ всѣхъ высокороднѣйша и честнѣйша.

Преосвященныи архіереи и весь чинъ Духовный, то лице человѣчье, Ангельскими желаніи украшенное; Ангельскій бо чинъ на себѣ носятъ. Тіи высокими Богомыслія умы, аки крилами къ Богу возносящеся, о Вашемъ Царскомъ здравіи, долгоблагополучіи, спасеніи Бога выну молятъ.

Храброе воинство, то лице львово, съ зѣльнымъ устремленіемъ на брань текущее, а за Государя своего здоровье свое полагающее.

Все общество, поспольство, народное множество Христіанскому Монарху, Вашему Царскому пресвѣтлому Величеству подчиненные, то лице тельчее, яремъ повиновенія трудолюбнѣ и тщательнѣ носящее: на таковыхъ лицахъ маестатъ Вашъ Монаршій почиваетъ, и носимый есть. Вси бо Вашему Царскому пресвѣтлому Величеству, раболѣпно своя поклонше главы, достойную воздаютъ честь и повиновеніе: Емуже честь, честь. Еще же маестатъ Христа Господня, Помазанника Божія, имѣетъ и ассистенты своя знаменитыя, по подобію ассистенціи Маестату горнему, о нихже Давидъ: возношенія Божія въ гортани ихъ, и мечи обоюду остры въ рукахъ ихъ (Псал. 149, 6). Тыи надежда на Бога, яко помощію того сотворятъ отмщеніе во языцѣхъ, покорятъ подъ ноги Ваши Монарши всякаго врага и супостата. Сице лице Христа Господня, Царя Христіанскаго, и маестатъ Его со всѣми своими ассистентами, таинственнымъ нѣкіимъ одарованіемъ имѣючи на себѣ подобіе лица Христова, и подобіе славы маестата Христова, радостотворно есть (лице Царево) сынамъ Сіонимъ, еже бы имъ радоватися о Царѣ своемъ. Таковое лице Царево азъ недостойный во обители моей, при иноческихъ и іерейскихъ молитвахъ моихъ, во умѣ обнося, и пресвѣтлый Вашъ Монаршій Сенатъ душевныма очима созерцая, къ нему аки къ привѣтствующему въ помыслѣ глаголахъ: блажени очеса видящіи, яже вы видите, и слышащіи, яже вы слышите (Лук. 10, 23). Нынѣ же и самъ милостивымъ Вашего Царскаго пресвѣтлаго Величества Указомъ сѣмо призванный, сподобльшійся Ваше Царское Пресвѣтлое лице недостойныма моима очима зрѣти, блаженна себе глаголю быти, радующися о Царѣ моемъ, къ Егожъ Царскому Пресвѣтлому маестату раболѣпнѣ припадая, юже имамъ въ сердцы моемъ ждичливость, усты изъявляю Давидскими вѣщаньми: да дастъ Господь по сердцу твоему, и весь совѣтъ твой исполнитъ, исполнитъ Господь вся прошенія твоя (Псал. 19, 5-6)! Да обрящется рука твоя всѣмъ врагомъ твоимъ, десница твоя да обрящетъ вся ненавидящія тебе (Псал. 20, 9)!

Да и мы богомольцы Вашего Царскаго Пресвѣтлаго Величества возрадуемся о спасеніи Твоемъ, о храбрости несвитяженной, о многолѣтномъ и благополучномъ Скипетродержавствіи и Царствоправленіи.

Слава же Вашего Пресвѣтлаго Маестата, и (при Божіей помощи) силы, да во вся концы земные простирается, и да слыветъ отъ родовъ въ роды, въ послѣдняя вѣки! О томъ Бога молю, и кланяюся. Аминь.

Источникъ: Сочиненія святаго Димитрія, Митрополита Ростовскаго. Часть первая, содержащая въ себѣ разныя небольшія сего Святителя творенія, съ присовокупленіемъ житія его и келейныхъ записокъ. — Изданіе седьмое. — М.: Въ Сѵнодальной Тѵпографіи, 1848. — С. 50-54.